Дэлхийн зар сурталчилгааны зардал 2024 онд 1.08 их наяд ам.долларт хүрнэ

WARC-ын сүүлийн судалгаагаар дэлхийн сурталчилгааны зардал 2024 онд 10.7%-иар өсөж, 1.08 их наяд ам.долларт хүрэх төлөвтэй байна. Энэ нь сүүлийн зургаан жилийн хамгийн хүчтэй өсөлт болж байгаа бөгөөд өсөлтийн гол хөдөлгүүр нь дижитал платформ, ялангуяа Facebook, Instagram, TikTok зэрэг нийгмийн сүлжээний платформууд болж байна.

Мөн уламжлалт хэвлэл мэдээлэл ч тодорхой хэмжээгээр өсөлт үзүүлж байгаа бөгөөд телевизийн зар сурталчилгаа хоёр жил дараалан буурсны дараа энэ жил 1.9%-иар нэмэгдэнэ гэж тооцоолжээ. Гэсэн хэдий ч телевизийн зар сурталчилгааны зах зээл дэх хувь хэмжээ эрс багасаж, 2013 онд 41.3% байсан бол өнөөдөр 14.3% болж буурсан байна.

Дэлхий даяарх томоохон технологийн компаниудын ноёрхол үргэлжилж, Alphabet, Amazon, Meta зэрэг платформууд зах зээлийн 68.8%-ийг эзэлсээр байгаа ч тэдний үйл ажиллагааг зохицуулах хууль, журамд нэмэлт өөрчлөлт оруулах эрсдэлүүд байгаа. Жишээлбэл, АНУ-ын Шүүх Google-ийг хайлтын зах зээлд монополь байр суурь эзэлсэн гэж үзэж байгаа нь томоохон өөрчлөлтөд хүргэж магадгүй.

Энэ бүхэн нь 2024 оны зар сурталчилгааны зардал огцом нэмэгдэж байгаа хэдий ч зах зээлд оролцогчдын хувьд болгоомжлолыг бий болгож байна. Ирэх жилүүдэд сурталчилгааны орлого үргэлжлэн өсөх төлөвтэй байгаа ч томоохон тоглогчдын орчин болон дэлхийн эдийн засгийн нөхцөл байдал энэхүү өсөлтийг хязгаарлах эрсдэлтэй байна.

Эх сурвалж: Campaign Asia